Tanosil kasalliklari qo’zg’atuvchilari, odamdan odamga, asosan, jinsiy aloqa orqali, notanish yoki tanish odamlar bilan tasodifiy aloqalar natijasida yuqadi. 1974 yilda JSST tavsiyasiga ko’ra «venerik kasalliklar» atamasini «jinsiy yo’l bilan yuqadigan kasalliklar» bilan almashtirishga qaror qilindi, qisqartirilgan atamasi — JYYK.
So’nggi yillarda JYYK bilan kasallanish sezilarli darajada oshdi, bu holat quyidagilar bilan bog’liq:
- jinsiy faoliyatning erta boshlanishi;
- jinsiy sheriklarning ko’p o’zgarishi;
- prezervativdan foydalanishni e’tiborsiz qoldirish;
- yetarli jinsiy ma’lumotga ega emaslik;
- o’zboshimcha davolash va boshqalar.
Ko’p tanosil kasalliklari tez davolanadi. Davolashsiz ularning ba’zilari sog’liq muammolarini keltirib chiqarishi mumkin, ammo tanosil kasalliklari orasida bepushtlik, yurak, qon tomirlar, bo’g’imlar kasalliklarini keltirib chiqaradigan turlari ham mavjud. Jinsiy yo’l bilan yuqadigan infeksiyalarning ba’zilari tanada uzoq vaqt o’zlarining mavjudligini ko’rsatmasdan, «uxlagan» holda bo’lishi mumkin, ammo shu bilan birga tanaga zararli ta’sirini ham ko’rsatadi. Shifokorga o’z vaqtida murojaat qilish uchun ushbu kasalliklarning namoyon bo’lishini bilish muhimdir. Davolash qancha erta boshlangan bo’lsa, uning samaradorligi shunchalik yuqori bo’ladi.